Lèggio ca a Montecarlo sotto ô patrunato d’ ‘o principe Alberto II, Edson Arantes do Nascimento, aliasse Pelé è stato premiato cu ‘o “Golden Foot Award” ‘a ‘na giuria ‘nternazziunale nun saccio furmata ‘a chi. E è stato ‘ncurunato, a vulé stà a crerere ‘e comunicate stampa d’ ‘e pennarule, comme ‘o cchiú granne jucatore ‘e pallone ‘e sempe o allimmeno d’ ‘o seculo passato... e pare ca è stato dato ‘stu ricunuscimento a pPelé ‘mmiezo a ‘na torma ‘e celebbrità nobbele sdobbele e vips! Secondo me ‘e cumpunente ‘e ‘sta giuria ‘nternazziunale quanno ànnu diciso ‘sta cosa stévano fatte a vvino e ancòra s’ànn’ ‘a repiglià. Pelé fósse meglio ‘e Maradona? Ma ve ne jate o no! Avastano tre semprici cunsiderazzioni pe capí ca ‘a giuria ‘nternazziunale à pigliato ‘nu palo! E me spieco: Mazzeca e uno: Pelé à jucato sulo dint’ô campiunato brasiliano e à quase fatto ‘o vallo ‘ncopp’â mmunnezza; Maradona ‘mmece è vvenuto a gghiucà ‘nnAiropa dinto a dduje campiunate assaje difficultuse.
Mazzeca e ddoje : Pelé à vinciuto tre mundiali jucanno cu scuatre naziunale ca tutte ànnu judicate ‘nfra ‘e cchiú fforte ‘e tutte ‘e tiempe, chiene ‘e jucature ‘mpurtante comme a Djalma Santòs(so) e a Niltòn(ne) Santòs(so) terzine overo‘nfra ‘e cchiú fforte ‘e tutte ‘e tiempe,o comme a Garrincha ca è ‘a cchiú forta ala d’ ‘a storia, pe nun parlà d’ Orlando, ‘e Bellini,’e Zito, Didí , Vavà, e Zagalo e pe nun parlà d’ ‘o Brasile ca ‘nMessico 1970 stracciaje a ll’Italia quanno Pelé teneva pe cumpagne ggente comme a Carlos Alberto, Piazza, Brito, Everaldo, Clodoaldo, Gerson, Rivelino, Jairzinho, Tostao e scusate si è ppoco;Maradona à vinciuto ‘nu mundiale jucanno quase isso sulo cu ‘na nazziunale scarzulella e cu dduje sule jucature bunarielle(Valdano e Burruchaga); n’atu mundiale ll’êsse vinciuto ancòra ‘e cchiú ‘a sulo, ma ce ll’arrubbajeno! Mazzeca e ttre :: Ô tiempo ’e Pelé pe ‘nu jucatore ‘e tecnica superiore era cchiú facile metterse ‘nmostra pecché ‘o juoco era meno atletico, se jucava a tre o quatto a ll’ora e nun s’era assillato dê marcature: uno riceveva ‘o pallone tranquiillamente, ‘nu difenzore lle rummaneva annante, isso ‘o scartava e tte saluto; ô tiempo ‘e Maradona era tutta n’ata musica: ‘o juoco era assaje cchiú atletico, se jucava sempe ‘nvelocità e currenno a capa e nnoce d’ ‘o cuollo e comme si nun avastasse ce stevano sempe duje o tre avverzarie ca te muntavano ‘a guardia e primm’ancòra ‘e ricevere ‘o pallone uno s’êva ‘a guardà ‘a castagna pe bbia ca ‘o difenzore te traseva ‘ncopp’ê ggamme senza jí tanto p’ ‘o suttile! Quindi per indi poi ‘a giuria ‘nternazziunale po’ ddicere chello ca vo’ essa, ma i’ nun ‘a crero e rimane sempe ‘o fatto ca pe mme Maradona è mmeglio ‘e Pelé e se facesseno cchiú dinto ‘e dinto addó sanno lloro e ‘o “Golden Foot Award” dato a Pelé!
Ve saluto, ce sentimmo â prossima vota!
